Skólagjöld eru mjög misjöfn eftir löndum. Hafa má sem þumalputtareglu, að skólagjöld eru há í enskumælandi löndum, en yfirleitt lág eða engin í ríkisháskólum í öðrum löndum. Í einkaskóla þarf að borga skólagjöld. Á Norðurlöndunum eru engin skólagjöld í ríkisháskólana og á það við hvort sem kennt er á ensku eða ekki. Við bandaríska háskóla þarf yfirleitt að borga sérstakt umsóknargjald þegar sótt er um og fæst það ekki endugreitt.

Ekki er mikið um námsstyrki í grunnnám erlendis. Helst er að athuga möguleika hjá viðkomandi skóla og þá sérstaklega ef verið er að borga há skólagjöld, t.d. í Bretlandi, Bandaríkjunum, í Kanada og víðar. Oft er að finna á heimasíðum skólanna sérstakar upplýsingar undir "Financial Aid". Einnig er hægt að athuga með íþróttastyrki, sem margir Íslendingar hafa nýtt sér, sérstaklega við skóla vestanhafs.

Sjá Handbók um styrki hérna til vinstri á síðunni.

Flestir sem fara í nám erlendis taka námslán hjá Lánasjóði íslenskra námsmanna. Almenna reglan hjá Lánasjóðnum er að nám er lánshæft ef það er háskólanám eða sérnám (nám sem veitir starfsréttindi). Hægt er að sækja um framfærslulán og/eða skólagjaldalán. Frá og með skólaárinu 2007/08 hefur verið hægt að sækja um skólagjaldalán í erlenda háskóla bæði í grunnnám og framhaldsnám, en áður var eingöngu hægt að fá skólagjaldalán í framhaldsnám erlendis, en bæði í grunn- og framhaldsnám hér á landi.

Dvalarleyfi o.fl.

Dvalarleyfi/sjúkratryggingar:  Þegar dvalið er erlendis til lengri tíma þarf að skrá sig inn í viðkomandi land og fá dvalarleyfi. Misjafnt er eftir löndum hvernig þessu er háttað, en í stórum dráttum má skipta löndum heims í þrennt hvað þetta varðar.

Norðurlönd:  Dvelja má í öðru Norðurlandi í allt að 6 mánuði án þess að skrá sig í landið. Ef dvalið er lengur þarf að skrá sig hjá þjóðskrá viðkomandi lands eða sveitarfélags (Folkeregister). Einnig ber að tilkynna flutninginn til Þjóðskrár hér á landi. Ráðlegt er að taka með sér evrópskt sjúkratryggingaskírteini frá Tryggingastofnun ríkisins sem sýnir fram á að þú sért sjúkratryggð(ur) á öllu evrópska efnahagssvæðinu. Lesa vel á heimasíðu Tryggingastofnunar um skilyrði til að nota kortið. T.d. gildir það eingöngu á ríkisreknum sjúkrastofnunum og eingöngu fyrir læknisaðstoð sem er nauðsynleg á meðan á dvöl erlendis stendur.

Lönd á evrópska efnahagssvæðinu: Öll lönd Evrópusambandsins ásamt Íslandi, Noregi, Sviss og Liechtenstein teljast til evrópska efnahagssvæðisins. Dvelja má í öðru landi á evrópska efnahagssvæðinu í allt að þrjá mánuði án þess að skrá sig í landið og fá dvalarleyfi. Eftir það þarf að sækja um dvalarleyfi (residence permit) á viðkomandi skrifstofu. Alþjóðaskrifstofa viðkomandi skóla ætti að geta veitt upplýsingar um hvar á að skrá sig. Þegar maður sækir um dvalarleyfi þarf oftast að sýna fram á að maður geti fjármagnað sig í landinu (t.d. með bréfi frá LÍN), sýna að verið sé að fara að stunda nám (með acceptance letter frá skóla) og vera með gilt vegabréf. Einnig er gott að hafa með sér nokkrar passamyndir. Muna að taka með sér evrópska sjúkratryggingakortið frá Tryggingastofnun ríkisins og lesa skilmála um notkun þess: http://www.tr.is/sjalfsafgreidsla/evropskt-sjukratryggingakort/

Lönd utan evrópska efnahagssvæðisins:  Í öll önnur lönd má reikna með að þurfa að sækja um vegabréfsáritun (student visa) til þess að geta stundað nám. Þá er best að byrja á að fara í viðkomandi sendiráð eða til ræðismanns og sækja um vegabréfsáritun fyrir stúdenta (student visa). Sjá undir "Sendiráð/ræðismenn" hérna á síðunni. Þetta er gert þegar búið er að fá inngöngu í nám (acceptance letter). Íslendingar eru ekki sjúkratryggðir í löndum utan EES og því þarf að kaupa sjúkratryggingu. Oftast er það gert í gegnum viðkomandi menntastofnun.